Անհատական բնակելի տուն Առինջում (Ա թաղամաս)

Նախագծի նպատակը Նախագծի նպատակն է Կոտայքի մարզի Առինջ գյուղի Ա թաղամասում ստեղծել հարմարավետ և լիարժեք կահավորված երկհարկանի առանձնատուն: Նախագիծն իր մեջ ներառում է ոչ միայն բնակելի տարածքներ, այլև ավտոտնակ, օժանդակ շինություններ և քարե պարիսպ՝ ապահովելով բնակիչների գաղտնիությունն ու անվտանգությունը հարթ ռելիեֆով օժտված 800 քմ հողատարածքում: Հատակագծային լուծումներ Շինությունն աչքի է ընկնում հարկերի ֆունկցիոնալ բաշխվածությամբ և օժանդակ տարածքների առկայությամբ. Ցածր մակարդակ (-0,450 նիշ): Այս մակարդակում նախատեսված են ավտոտնակը, կաթսայատունը և խորդանոցը՝ տնտեսական գոտին առանձնացնելով բնակելիից: Առաջին հարկ (±0,000 նիշ): Հատակը բարձրացված է հողի մակերևույթից 450 մմ-ով: Այստեղ տեղակայված են հյուրասենյակը, խոհանոցը, նախամուտքն ու մեկ ննջասենյակ՝ լոգասենյակով: Այս հարկն ունի ուղիղ ելք դեպի բակային հարթակ: Երկրորդ հարկ (+3,300 նիշ): Նախատեսված է մասնավոր հանգստի համար, որն իր մեջ ներառում է երեք ննջասենյակ, զգեստասենյակ և երկու բաց պատշգամբ: Տանիք: Բազմալանջ տանիքը՝ կազմակերպված արտաքին ջրահեռացմամբ, լրացնում է շենքի դասական ու ժամանակակից ոճերի համադրությունը: Ճարտարապետական և էսթետիկ լուծումներ Ճակատային հարդարում: Արտաքին տեսքն առանձնանում է նյութերի հարուստ համադրությամբ՝ սպիտակ տրավերտին, սև տուֆ և բազալտ: Քարե երեսպատումը համադրված է դեկորատիվ սվաղի հետ, ինչը շեշտում է շենքի ճարտարապետական ծավալները: Պարիսպ և Բարեկարգում: Հողատարածքը պարսպապատված է մինչև 2,5 մ բարձրությամբ քարե պարսպով: Հողամասի շուրջ 59%-ը կանաչապատված է, իսկ մնացած տարածքում նախատեսված են մայթեր և բարեկարգված անցումներ: Տեխնիկական բնութագիր Մակերեսներ: Բնակելի տան հարկերի ընդհանուր մակերեսն արտաքին եզրագծով կազմում է 265.13 քմ: Կառուցապատման ընդհանուր մակերեսը (ներառյալ ավտոտնակը) կազմում է 147.74 քմ: Բարձրություն: Շենքի առավելագույն բարձրությունը հասնում է 9.1 մետրի, ինչն ապահովում է վեհաշուք տեսք և հարմարավետ բարձրությամբ ներքին սենյակներ: